UNXUNGUPHELE URAMAPHOSA ZIZANTYALA ELIMPOPO

NguPhumzile Ngcatshe

POLOKWANE: UMongameli uCyril Ramaphosa utyelele iphondo laseLimpopo ngolwesithathu eyokuzibonela umonakalo ngenxa yezantya-ntyala zemvula.

Ezi mvula zithe zashiya uluntu lunxunguphele yaye zithe zakhukhulisa izindlu abantu balahlekelwa kuquka izikolo nemfuyo.

Kutyelelelo lwakhe, lokaRamaphosa ebephelekwe yiNkulumbuso uPoppy Ramathuba nalapho bethembise ngokunceda uluntu lwaseLimpopo.

Kwindawo ezithe zafumana umonakalo ziquka ilali yaseMbaula kwisithili saseMopani nalapho kuthe kwakhukhuliseka izindlu ezingama36.

FUNDA NALAPHA: UMASIPALA UXHOBISA ABAHLALI NGOMLILO EGQEBERHA

Kusenjalo, uMongameli uthe kubuhlungu ukufumanisa ukuba kukho nomntana oneminyaka emihlanu othe waphulukana nobomi bakhe kwezimvula.

Nangona kunjalo, uRamaphosa uncome uluntu ngokusebenzisana njengokuba bezama ukuhlangulana kwesi sithwakumbe.

“URamaphosa uncome namalungu omkhosi wesizwe iSANDF athe azijula ijacu kwiinzame zokuhlangula abantu bakulengingqi,” itsho iSABC.

FUNDA NALAPHA: GRADE 12: OBHALE ENGABONI UBUYE NEBACHELOR

Ongomnye othe wachaphazeleka sesi sehlo uFiona Mathebula, uthe balahlekelwe yinto yonke yaye uxakekile ukuba aqale ngaphi.

“Oko inetha lemvula iintsuku ezine ukuya kwezintlanu. Imeko imbi kakhulu apha. Abantu balahlekelwe zizindlu namakhaya wabo. Ndingatsho ndithi itshabalele indawo yethu,” utshilo.