ULEON UPHAWULA NGESIGQIBO SOKUYA ECHLOORKOP
NguPhumzile Ngcatshe
CHLOORKOP: Umdlali omtsha kraca weMamelodi Sundowns uBrayan León udiza izizathu zakhe zokujoyina eliqela laseTshwane.
Lomdlali ophuma kwilizwe laseColombia uthi liqela elikhulu ezintshatsheli zeBetway Premiership yaye ibisisigqibo esilula kuye.
IDawana ibhengeze lomdlali ngomvulo nobedlalela iqela elaziwa Independente Medellin yaye udlala njengefolosi.
Kuyacaca ukuba Isundowns izimisele ukuyigcina indebe yeligi yaye ilwele neyeCAF Champions League kulesizini.
FUNDA NALAPHA: UNCOMA UBUNYE UMQEQESHI WEPIRATES
Kuvela Iindaba zokuba iqela likaMiguel Cardoso lisayine lomdlali kulempelaveki eqgithileyo nalapho ethe wagaleleka kwinkampu yabo ebanjelwe ePolokwane.
Kusenjalo, iSundowns isayine nomdlali weOrlando Pirates uMonnapule Saleng kuquka noweTS Galaxy uKhulumani Ndamane.
“Ndityumbe iSundowns ngokuba ndifuna imiceli-mngeni emitsha,” utshilo lomdlali oneminyaka engama25.
“Ndicinga ukuba liqela elihle eli yaye liqela elikhulu elinempumelelo eyaziwayo. Ndicinga ukuba kuhleli kukuhle ukuba nemiceli-mngeni efana nale – ndifuna ukuba yintshatsheli apha.
HALALA: UGADE UVUYILE ZIZIPHUMO ZEBANGA LESHUMI
“Ndiyathemba ukuba ndizakwazi ukubuyisa intembeko ebonakaliswe leliqela. Sendiyitshilo ke eyokuba lelona qela elinempumelelo eli.
“Ngaphezu koko, ndicinga ukuba ndiyazazi ukuba ndizokwenzantoni apha – ndifuna impumelelo, ndiphakamise iindebe ndilenze libelikhulu kangangoko eliqela.”
ISundowns kulindeleke ukuba livule umjikelo wesibini weligi kunye neOrbit College ngomvulo, ngomhla ka19 kulenyanga.
