BATYITYIMBISELWE UMNWE ABATHENGISA UKUTYA OKUDALA
Izikhalazo zabahlali baKwaNokuthula ePlettenberg Bay zokuba abanini bezirhoxo bathengisa ukutya okuphelelwe lixesha zikhokelele ekugqogqweni kwevenkile kulelokishi. Olugqogqo belukhokelwa licandelo lonyanzeliso mthetho likamasipala waseBitou, lincediswa ngamagosa ezempilo okusingqongileyo kamasipala wesithili iGarden Route. Kolugqogqo kuthinjwe intlaninge yokutya nezinye izinto ebezisele ziphelelwe lixesha kwiivenkile eziliqela kummandla wasePhase2.
Umhloli kwicandelo lonyanzeliso mthetho kumasipala waseBitou, uXolani Bangela uthi ukuthengiswa kokutya okuphelelwe lixesha nezinye izinto ezingekho mgangathweni kunefuthe elibi kwimpilo yoluntu. “Iziganeko zokusweleka kwabantu kutsha nje kweli kuko okunyanzelise siqhube olugqogqo”, wongeze ngelitshoyo uBangela.
Abanini beevenkile ekufumaneke kuzo izinto ezindala batyityimbiselwe umnwe baze bafundiswa ngobungozi bokuthengisa ukutya okuphelwe lixesha. Ezizinto ziye zayokulahlwa kwindawo ekulahlwa kuyo inkunkuma kamasipala kwaye eliphulo lizakunwenwela nakwenzinye iingingqi kuledolophu.
