UMEC UKONTSIWE UNIKEZELE NGENKONZO EQHIMIRHA
NguPhumzile Ngcatshe
STERKSPRUIT: Njengokuba ethe gqolo ukuzisa iinkonzo eluntwini, uMphathiswa weZolimo eMpuma Koloni uNonceba Kontsiwe unikezele ngesakhiwo soluntu eQhimirha.
Esi sakhiwo esaziwa njengeMulti Purpose Shearing Shed ezakuncedisana nabafuyi nabalimi, sithe savulwa ngokusesikweni ngolwesibini ngaphandle nje kwaseSterkspruit.
Ngokwengxelo edizwe ngabakwaGovernment Communication and Information Service, (GCIS), nguTlotlisang Koena eJoe Gqabi, uKontsiwe unikezele nangetele-tele (tractor).
FUNDA NALAPHA: UMEC FANTA UPHEHLELELE IPHULO LEGBV EMALETSWAI
Abahlali balelali engaphantsi kukaWard 2 kuMasipala waseSenqu bebengungelene kwisakhiwo sasekuhlaleni nalapho bebonakale benochulumanco.
Ngaphezu koko, abahlali bathe bajizwa nangempompo yamanzi nalapho uKontsiwe ebephelekwe nguSodolophu waseSenqu uKhansila Velile Stokhwe.
Kwintetha yahe, uStokhwe ugxininise ukubaluleka kokuqinisa ulimo nokuxhobisa abafuyi beliphondo leMpuma Koloni nakwesisithili saseJoe Gqabi.
“Kuyafuneka abahlali okanye uluntu lusebenze ngokubambisana ukuze sikwazi ukubona uMasipala wethu enesakhiwo sokuxhela i-abbatoir,” utshilo uStokhwe.
LoSodolophu uthe waqhuba esithi kubalulekile ukuxhobisa ulutsha yaye lukhuthazwe okokuba lusondele luzibandakanye kwezolimo.
FUNDA NALAPHA: ANQONGOPHELE AMAFUTHA KWISIKHULULO EKAPA
Kusenjalo, uStokhwe uthe walukhalimela ubiwo lwemfuyo ngabula istock theft nalapho ethe lomkhwa unegalelo nefuthe elibi kwiimpilo zabantu nakubalimi jikelele.
Kusenjalo, ingxelo idiza ukuba uStokhwe kunye noKontsiwe bathe baqhuba nohambo lwabo besingise kwilali ekufuphi eQhoboshiane nalapho bebekutyelelo lwaseburhulumenteni.
