BAYABETHAKALA ABAKHWELI BEE-TAXI NGUMNGCELELE
Amakhulukhulu wabantu abetha ngezikatshiwo ukusuka kwilokishi yaseThembalethu uyokufikelela kwiindawo zempangelo nezinye ngalentseni. Oku kungenxa yomngcelele wabahlali okhokelwa ngumbutho wasekuhlaleni iSANCO (South African National Civic Organisation) nombutho iGCF (George Community Forum). Lo mngcelele ujolise ekuqaqambiseni uluhlu lwezikhalazo kumasipala waseGeorge ekuhambeni kwemini.
Izikhalazo ekulindeleke ukuba zitshotshe entla ziquka: ukuxhoma kwexabiso lombane, ukufakelwa kombane kwiindawo zamatyotyombe, izinga lobundlobongela eliphezulu, ukugqogqwa kwezirhoxo zasekuhlaleni, ukuthinjwa kweeTaxi neminye imiba yasekuhlaleni. Lo mngcelele kulindeleke ukuba usuke ngentsimbi yethoba ngalentseni, ukusingisa kwiiOfisi zikamasipala.
Abona bantu bathwaxekileyo ngabakhweli abasebenzisa iiTaxi kuba nazo azihambi ngenxa yokuba zixhasa lo mngcelele. Amakhulukhulu wabakhweli basheke bedinga, bambi bebexinaniselana kwiibhasi zakwaGo George ezisebenzayo namhlanje. Okwangoku iseliqaqobana labantu ekubonakala ukuba bazozibandakanya nalomngcelele, nabasele begaleleke kwisango yaseThembalethu (4 way stop).
